БИШКЕК, 26-фев. — Sputnik. Россияда 2018-жылда өтө турган футбол боюнча дүйнөлүк чемпионатка даярдык көрүүгө кеткен каражат алты миллиард рублге кыскарды. Бул туурасында РФ өкмөтүнүн токтому укуктук маалыматтар порталына жайгаштырылды.
Токтомдун негизинде, өкмөт мурда чемпионатка даярдык көрүүгө кете турган каражатты бекиткен сметага өзгөртүү киргизилди.
Дүйнөлүк футбол чемпионатына даярдыктардын программасына жумшалчу каражат 626 млрд. 925,9 млн. рублден 620 млрд. 865,9 миллион рублге кыскарды.
2018-жылдын 14-июнунан 15-июлуна чейин Россияда алгач ирет дүйнөлүк чемпионат өтөт. Турнирдик беттешүүлөр Москва, Калининград, Санкт-Петербург, Волгоград, Казань, Нижий Новгород, Самара, Саранск, Ростов-на-Дону, Сочи жана Екатеринбург шаарларында өтөт.
