БИШКЕК, 22-фев. — Sputnik. Стамбул шаарында кытай ишкеринин 88 миң долларын уурдап кеткен кыргызстандык жаран кармалганын Түркиянын Нaberler гезити жарыялады
Басылманын маалыматы боюнча, окуя 19-февраль күнү шаардын Аксарай аттуу районунда болгон. Кытай жаранынын айтымында, ал ишемби күнү кечинде жумуштан чыгып унаасына отурар маалда эки адам кол салган. Бир нече ирет сокку ургандан кийин ишкер эс-учун жоготуп койгон. Каракчылар анын акча салынган сумкасын алып, из жашырып кетүүгө үлгүрүшкөн. Бардык окуянын жүрүшү видеокамерага түшүп калган.
Уурулукка шектелип Стамбулдун полициясы эки адамды кармады, анын бирөө кытайлык болсо, экинчиси — Кыргызстандын жараны экени белгилүү болду.
Басылма жабыр тарткан ишкер Стамбулда текстиль бизнеси менен алектенип келерин белгилейт.
