БИШКЕК, 11-фев. — Sputnik. Кечээтен бери Кыргызстанда эки ирет жер титирегенин ӨКМ билдирди.
Маалыматка ылайык, 10-февраль күнү саат 18.43тө болгон силкинүүнүн очогу Бишкек шаарынан түштүк-чыгышты карай 55 чакырым алыстыкта жайгашкан. Сейсмология институту анын магнитудалык күчү 3 баллга жеткенин кабарлады. Жер титирөөнүн күчү Арпа-Тектир айылында 3 балл, Серафимовка айылында 2,5 балл, Совет, Горная-Маевка жана Дөң-Арык айылдарында 2 балл болуп сезилген.
Бүгүн таңкы саат 05.52де Жалал-Абад шаарында магнитудалык күчү 4 баллга жеткен силкинүү катталган. Мында Жалал-Абад шаары менен Чеке-Дөбө, Таш-Булак айылдарында 4 балл, Көкө-Жаңгак, Базар-Коргон, Өзгөндө 3 балл, Кочкор-Ата, Отуз-Адырда 2,5 балл болуп сезилген.
Алдын ала маалыматтар боюнча жапа чеккендер болгон жок.
Эскерте кетсек, мындан эки мурун Ысык-Атада (Бишкектен 50 чакырым алыстыкта) 3 баллдык жер титирөө болгон.
