БИШКЕК, 4- фев. Sputnik. Анкара Түркияга кыска мөөнөттүк жумушчу сапары менен бара турган россиялык журналисттерге 15-февралдан тартып виза режимин киргизди. Бул тууралуу Түркиянын Россиядагы элчилиги билдирди.
Маалыматка ылайык, турист болуп барган россиялык журналисттерге виза керектелбейт. Жумуш менен Түркияда барууну пландаган журналисттер гана виза алууга милдеттүү.
"Түркияга кыска мөөнөттүк жумушчу сапары менен бара турган журналисттер 15-февралдан тарта виза алышы керек. Мындай чечим түрк журналисттери Россияда иштөө үчүн виза алуусу керек деген чечимге жооп катары алынды", — деди элчиликтин өкүлү.
Ошол эле учурда Түркияда туруктуу иштеген россиялык журналисттерге карата тартип өзгөргөн жок. Алар мурункудай эле узун мөөнөттүү виза алып, ишин уланта беришет.
Расмий Анкара декабрь айынын аягында "Россия 1" телеканалынын атайын кабарчысын өлкөдөн чыгаргандан кийин Түркияда иштеген россиялык журналисттердин иштөө тартиби кылдат көзөмөлгө алынарын билдирген.
"Түркияда чет элдик кабарчыларды аккредитациялоо тартиби өзгөргөн жок. Тартип ар дайым бар болчу, бирок кылдат көзөмөлгө алынган эмес эле", — деди дипломат.
Чет элдик журналисттерди аккредитациялоо эрежелери Түркиянын басма жана маалымат Башкы башкармалыгынын расмий сайтында орус тилинде да жарыяланган.
