БИШКЕК, 3-фев. — Sputnik. Зика оорусу, илдетке кабылган өлкөлөр жана ага каршы вакцина тууралуу Sputnik Кыргызстан агенттигинин материалынан окусаңыз болот.
Көндүмгө айланган чочко тумоосунан тышкары, дүйнөдө Зика аттуу илдет пайда болуп, аны ушундай эле аталыштагы вирус жаратары ачыкка чыкты. Бул маймылдардын курч инфекциялык дарты болуп саналып, айрым учурда гана адамга чиркейлер аркылуу жугат. Вирус көбүнесе кош бойлуулар үчүн кооптуу, анткени, ал түйүлдүктүн мээсине доо кетирүүгө жөндөмдүү келет.
Биринчи жолу бул илдет 1947-жылы Угандада табылган, андан соң Латын Америкасына өткөн.
Зика илдетине байланышкан учурдагы кырдаал
- Вирус бир нече ондогон өлкөдө — Түндүк жана Түштүк Америка, Европа жана Азия мамлекеттеринде катталган. Жакында эле Дүйнөлүк саламаттык сактоо уюму Зика оорусун эл аралык масштабдагы кооптуу илдет экенин жар салды.
- Аталган дартка туш болгондордун саны тездик менен өсүүдө — РИА Новости агенттигинин маалыматы боюнча Бразилияда жарым миллион, Колумбияда 20 миң адам ооруга чалдыкканы аныкталган.
- Вирус адамдан адамга өтүп тарады. Биринчи учур АКШда катталган. Оору Зика дарты кеңири жайылган өлкөдөн келген адам менен болгон жыныстык байланыштан кийин жуккан.
Инфекциянын алдын алуу иштерине Кыргызстан да даярдык көрүп жатат. Республикалык карантин жана өтө кооптуу инфекциялар борбору ыкчам түрдө Саламаттык сактоо министрлигинин аталган илдетке каршы чараларды көрүү боюнча буйругу даярдалып жатканын белгиледи.
"Жобосу жаңыдан иштелип чыгууда. Негизинен учактарга көзөмөл күчөтүлөт. Эгер өлгөн же учуп жүргөн чиркейлер аныкталса, аба кемелерин тазалап чыгабыз", — деп билдирди борбор.
Өлкө оорунун очогунан кыйла алыс жайгашкандыктан, азырынча илдеттин жайылуу коркунучу жок. Ал эми министрликтин тийиштүү буйругу айдын аягына чейин чыгары пландаштырылууда.
