БИШКЕК, 28-янв. — Sputnik. Россиянын Лев Толстой кыштагында жашаган кыргызстандык жаран мектепте жардыруу боло турганы тууралуу жалган маалымат бергенин Липецк облусунун прокуратурасынын сайтында айтылат.
Кылмыш иштин материалдары боюнча кыргызстандык мигрант мас болуп алып кыштактагы мектепке бомба коюлганы тууралуу муниципалдык кызматтарга 1-январда чалганы маалымдалды.
Өз аракетин кыргызстандык көптөн бери Россия жарандыгын ала албай жүргөнүн, бул кадамы менен өзүнө көңүл бурдуртуу ниети менен түшүндүрдү.
Иштин иликтенишине райондук прокуратура көз калып, аны сотко жөнөттү. Мыйзамга ылайык, эми кыргызстандык жаранга 200 миң рубль өлчөмүндө айып пул же 480 саат кара жумуш чегерилет. Болбосо бир жылдан эки жылга чейин шарттуу түрдө эркинен ажыратылат. Мындан тышкары, бул сыяктуу мыйзам бузуу үчүн үч жылга чейин эркинен ажыратуу же кара жумушка кесүү каралган.
