БИШКЕК, 27-янв. — Sputnik. Учурда чет жактагы кыргызстандык мигранттардын саны 700 миңди түзөт. Бул тууралуу Мамлекеттик миграция кызматынын жетекчиси Бактыбек Адылов менен акыйкатчы Кубат Оторбаевдин жолугушуусунда белгилүү болду.
21 Үчтүн айы 2016, 09:50
Жолугушууда негизинен чет өлкөдө эмгектенип жүргөн мекендештердин укугунун корголушу талкууланды.
Маалыматка ылайык, учурда 700 миң мигранттын 520 миңи — Россияда иштеп жүрсө, 113 миңи Казакстанда катталган. Түштүк Кореяда 14 миң кыргызстандык эмгектенсе, Түркияда 10 миң мекендеш бар. Ал эми алыскы чет мамлекеттерде (Европа, АКШ, Жакынкы Чыгыш, Азия) 30 миңдей мигрант иштеп жүрөт.
Адылов менен Оторбаев чет жактагы мигранттардын укугун коргоо жаатында биргеликте иш алып баруу жана тыгыз кызматташуу боюнча макулдашышты.
