БИШКЕК, 22-янв. – Sputnik. Милиция спорт чебери Түмөнбаев 21-январдын түн ичинде мас болуп инспекторлорго кармалып, унаасын айып короого токтоткондугу үчүн аларды тапанча менен коркутканын билдирди. Буга ылайык спортчуга кылмыш иши козголду.
Каныбек Сагынбаев. Бильярд боюнча дүйнө чемпиону Сагынбаев 2014-жылы жол кайгуул кызматкерлерине мас абалында кармалган. Жол кайгуул кызматынын инспекторлоруна баш ийбей жаткан видеосу интернет булактарына тарап, эл арасында катуу талкууга алынган. Жыйынтыгында, бул боюнча административдик протокол түзүлүп, автоунаасы айып короого киргизилген.
Алексей Федосеев. Белгилүү кикбоксер, дүйнө чемпиондугу боюнча бир нече курдун ээси Федосеев 2013-жылы Бишкектеги тойканалардын биринде бирөө менен чартылдаша кеткен. Той бүткөндөн кийин бейтааныш 10 адам келип спортчуну сабап, жаагын сындырып салышкан.
Айсулуу Тыныбекова. Күрөш боюнча белгилүү кызыбыз Тыныбекова 2012-жылы өтө турган Олимпиадага даярдык көрүүнүн ордуна соттордо чуркап жүрүүгө аргасыз болгон. Анын себеби, Нуриля Кочкорбаева аттуу жаран Тыныбекова өспүрүм кызын сабап кеткенин айтып, сотко берген. Сот жабырлануучу тараптын Тыныбекованы олимпиада оюндарына катышуу мүмкүнчүлүгүн жокко чыгаруу суранычын аткарган эмес.
Руслан Түмөнбаев, Канатбек Бегалиев. Учурда кылмыш иши козголгон Түмөнбаев 2011-жылы спорттогу кесиптеши Канатбек Бегалиев менен биргеликте мушташка кабылган. Анда эки спортчу Финансы полициясынын кызматкерлери аларды сабап кеткенин моюндашкан. Бирок, спортчулар арыз менен күч кызматкерлерине кайрылбагандыктан, кылмыш иши козголгон эмес.
Киши болдуу болгон спортчулар…
Тилекке каршы, белгилүү спортчулар арасында киши колдуу болуп каза тапкандар да болду.
Руслан Абасов. Кикбоксинг боюнча дүйнөнүн эки жолку чемпиону Абасов Токмоктун кичи райондорунун биринде 2014-жылдын март айында унаасы менен кошо жарылып, курман болгон. Алган жаракатына байланыштуу ооруканага жетпей көз жумган. Иликтөө иштери жардыруучу зат айдоочу отурган отургучтун алдына катылганын тастыктаган.
Али Порсуков. Кикбоксинг боюнча дүйнө чемпиону Порсуков 2002-жылы Бишкекте киши колдуу болгон. Ал машыгуудан достору менен кайтып келе жаткан маалда, белгисиз адам алты жолу ок чыгарган. Бардык ок Порсуковго тийген. ИИМ кызматкерлери анын кылмыш дүйнөсүнө тиешеси жок экенин айтышкан. Ок жеген спортчу ооруканага жеткиче "Эмне үчүн?" деген суроону кайталап барган.
