БИШКЕК, 6-янв. — Sputnik. Жаңы жылдан кийин эле социалдык тармактын колдонуучулары Ысык-Көл облусунун Ак-Суу районундагы Алтын-Арашан капчыгайында карагайлар кыйылып жатканын билдиришип, сүрөттөрүн жайгаштырышты.
Ал эми токой чарба департаментинин сектор башчы Бакытбек Мусабаев Sputnik Кыргызстан маалымат агенттигине жыл жаңыргандан бери мыйзамсыз кыйылган карагайлар тууралуу арыздар түшө электигин билдирди.
Мусабаев мыйзамсыз карагай кыйгандарга салынчу минималдык айып 381 сом экенин айтат.
"Өкмөттүн 2013-жылдын 3-майындагы №224 токтомуна ылайык жоондугу 4 сантиметрге чейин болгон бактарды кыйгандарга 381 сом айып салынат. Ал эми 28 сантиметрден 32 сантиметрге чейинки бактар үчүн 1 272 сом айып каралган. Андан өйдө ар бир сантиметрине 381 сомдон кошулуп кете берет", — дейт ал.
Мусабаевдин айтымында, 2015-жылы 625 токой мыйзамын бузуу фактылары катталып, мамлекетке 8 миллион 325 миң 500 сом зыян келтирилген.
"Анын ичинен мыйзамсыз кыйылган бактардын саны 3609 түп. Анын баасы 3 миллион 369 миң сом деп бааланган", — дейт ал.
Карагайды мыйзамсыз кыюу фактылары Ысык-Көлдө, Жалал-Абадда, Нарында, Чүй облусунда көп катталарын ал кошумчалады.
