Адегенде коньки деген эмне деп сураган бөбөктөр азыр, зуулдатып муз үстүндө жүрүшөт.
Sputnik Кыргызстан ак-талаалыктарды конькиге тургузган Молдокмат Таалайбековду кепке тартты.
— Молдокмат, ушуну менен экинчи муз аянтчасын ачыптырсыз?
— Ооба, анын жалпы аянты 450 чарчы метрди ээлейт. Кош-дөбөлүктөр үчүн бүгүн жакшы окуя болду, балдар өзгөчө сүйүнүп жатат. Бул менин кошуна айылым, ага чейин өзүм туулган Коңорчокко ачканмын. Анын үстүнө азыр балдар каникулда эмеспи. Бир эле учурда 25 киши жылгаяк тебе алат. Баасы 30-50 сомдун тегерегинде.
— Азыр муз аянтчалары шаарда эле болбосо, элетте сейрек кездешет. Буга эмне түрткү болду?
— Балдардын кышында көңүл ачып, эс ала турган жайлардын жоктугу мени ушул ишке түрттү. Кичинекей кезде эс алууга кызыктуу жердин жок болушу абдан өкүндүрчү. Анан чоңойсом ушуну кылам дечүмүн. Кийин шаардан муз тээп жүрүп, жасаса болот экен деген ой келди.
— Шаарда өзүнүн жол-жоболору бар, атайын техника колдонулат. Сиз кандай кылып жасайсыз?
— Жылгаякты тебебиз деген балдар абдан кубанган чыгар да?
— Жалтыраган тунук музду көргөндө муну эмне менен тебебиз деген суроолор болгон. Коньки десең, бөбөктөр "ал эмне" деп сурашчу. Азыр кадыресе өздөштүрүп, зуулдатып тээп калышты. Ал тургай өнөрүн көрсөтүп, алдыга, артка жана капталдап тебишет. Музду көркөмдөп тебүүнүн элементтерин байкаса болот. Ал тургай кээде конькилерди сындап да калышат.
— Чоңдор да келеби?
— Чоңдор кызыгат, бирок, массалык түрдө эмес. Ал эми 80-жылдан кийин төрөлгөндөр зуулдатат. Айыл жергесинде кышында шерине уюштуруп алышат да, анын аягы анан "Көк жылгаякта" уланат. Жаңы жыл тосуу үчүн студенттер айылга келишет. Андан сырткары классташтар чогулуп алып өздөрүнчө тээп кетишет.
— Балдарды ата-энеси мектептен эмес, муздан издеп калган учурлар болобу?
— Жок, мектеп жетекчилиги менен сүйлөшкөнбүз, сабак учурунда музга киргизмей жок. Окуудан чыккандан кийин башка кеп. Мектеп жетекчилиги менен сүйлөшүп, муз үстүндө дене тарбия сабагын өтүүгө мүмкүнчүлүк түзүлдү. Балдар эстафета кылып, эки командага бөлүнүп, андан кийин "А" жана "Б" класс кылып ойнотуп, кызыктуу болот экен. Акырындап, балдарды муз тебүү маданиятына тартып жатабыз. Суук спорт залда отургандан көрө, муз үстүндө тердеп-тепчип жүргөн жакшы эмеспи.
— Бул иштен киреше табасызбы?
— Кандай десем, укмуштуу пайда таап жиберем дегенден алысмын, бирок, өзүн-өзү жабат. Маселен, конькилерди Бишкек шаарындагы "Дордой" базарына барып сатып келем. Азыр доллардын курсу өсүп, конькинин баасы 21 долларга чыгып кетти… Максатым — балдардын коньки тебүүгө болгон кызыгуусун ойготуу жана аны алардын турмушуна киргизүү. Кудай буюрса, бул маданият акырындап калыптанып келе жатат.
Кыргызстандын белгилүү муз айдыңдары тууралуу Sputnik инфографикасында көрө аласыздар>>
