БИШКЕК, 28-дек. — Sputnik. Россия президенти Владимир Путин Түркияга карата атайы экономикалык чараларды колдонуу боюнча жарлыкка кол койгонун Кремлдин маалымат кызматына таянуу менен РИА Новости билдирди.
Россия менен Түркиянын мамилеси Су-24 учагынын кыйратылышынан кийин солгундап кеткен. Россиянын Су-24 учагы түркиялык аскерлер тарабынан Сириянын аймагынан атып түшүрүлгөн. Путин муну "аркага сайылган бычак" деп баалап, Түркия мамлекетине карата экономикалык санкцияларды киргизген. Ага ылайык, эки өлкөнүн ортосундагы чартердик каттамдарга тыюу салынып, жаңы жылдан баштап түркиялык жарандарды жумушка алууга бөгөт коюлган. Мындан тышкары, Россиянын аймагында иш алып барган түркиялык уюмдардын иштөөсүнө чек коюп, айрым товарларды өлкө аймагына киргизүүгө тыюу салынган.
Путин Су-24 учагы Түркияга нефть жеткирүүнүн коопсуздугун камсыздоо максатында атып түшүрүлгөн деп айтууга толук негиз бар экенин маалымдаган.
