БИШКЕК, 24-дек. — Sputnik. Түркияда күч түзүмдөрү менен өлкөдө тыюу салынган Күрдистандын Жумушчу партиясынын (КЖП) согушкерлеринин ортосундагы куралдуу кагылышуудан улам 100 миңге чукул киши турак жайын таштап кетүүгө аргасыз болгонун Hurriyet гезитине таянуу менен РИА Новости билдирди.
Бийлик күрддөр жайгашкан Диярбакыр шаарындагы Сур, Ширнак провинциясынын Жизре жана Силопи, Мардин провинциясынын Нусайбине жана Даргечите райондорунда өзгөчө кырдаал жарыялады. Террористтерге каршы операцияга 10 миңге чукул аскер адамдары жана полиция кызматкерлери катышууда. Алар аталган аймакты КЖП мүчөлөрүнөн тазалап, аскердик техниканын өтүүсүнө каршы коюлган тосмолорду алып жатышат. Учурда көчөлөрдө атышуулар улантылып жатканы айтылууда. Акыркы сегиз күндүн ичинде 168 согушкер жана төрт полиция кызматкери каза болду.
Ушу тапта өлкөнүн күч түзүмдөрү 13 кооптуу аймактын сегизине көзөмөл орнотушту. Согушкерлер куралдуу кагылыштарды башка ири шаарларга алып өтүшү мүмкүн деген маалымат бар.
Түркиядагы абал 20-июль күнү Сирия менен чектешкен Суруч аймагында "Ислам мамлекети" террористтик уюм тарабынан уюштурулган терактыдан кийин курчуп кеткен. Мында 33 күрд активисти жок кылынган. Мындан тышкары, полиция кызматкерлери өлтүрүлүп, алардын жоопкерчилигин КЖП моюндаган. Бул мезгил аралыгында күрддүк согушкерлердин колунан 200дөй полиция жана аскер кызматкерлери менен бирге жай тургундар да каза болгон.
Түркиянын аскердик-аба күчтөрү 24-июлдан тарта согушкерлерге карай чабуулун баштаган. Беш айдын аралыгында Түркиянын күч түзүмдөрү 1,7 миң согушкерди жок кылган.
