БИШКЕК, 18-дек. — Sputnik. Бишкекте сентябрдан бери жүргүзүлүп келген эвакуация мыйзамсыз экенин Башкы прокуратура билдирди.
Маалыматка ылайык, 10-апрелде Жол кайгуул кызматы (ЖКК) Юстиция министрлигинен бир күн мурун каттоодон өткөн жеке компания менен келишим түзгөн. Мында макулдашуу эч кандай сынаксыз эле ишке ашканы айтылууда. 18-сентябрда келишим бузулганына карабай ЖКК кызматкерлери унааларды эвакуациялоого аталган компаниянын кызматын колдонуп келген. Ишкана өз кезегинде айдоочулардан төлөм акысын ала берген.
Аталган факт боюнча "Кызмат абалынан кыянаттык менен пайдалануу" жана "Өзүм билемдик" беренелеринин негизинде кылмыш иши козголуп, учурда тергөө амалдары жүрүп жатат.
