БИШКЕК, 9-дек. — Sputnik. Борбордук Азия калкынын саны 2050-жылы 96 миллионго жете турганын Улуттук стратегиялык изилдөө институту билдирди.
Эл аралык PRB (Population Reference Bureau) уюмунун божомолу боюнча 2050-жылы кыргызстандыктардын саны 11,6 миллионго жетет. Институттун директору Талант Султановдун айтымында, мындай жакшы көрсөткүч өлкөдө экономикалык жана саясий туруктуулук өкүм сүрө баштаганынан кабар берет.
Ал эми Казакстанда элдин саны 24 миллионго жетери айтылууда. Жергиликтүү эксперттердин айтымында, буга мамлекеттин үй-бүлөлүк баалуулуктарга басым жасаган идеологиясы менен катар жаш жубайларга көрсөтүлгөн материалдык жардам да өбөлгө болмокчу.
Түркмөнстандын демографиялык көрсөткүчү 2050-жыга карата кескин өзгөрүүлөргө учурабай турганы маалым болду.
Учурда Кыргызстанда калктын саны алты миллионго жетти. "Мааракелик" бөбөк үстүбүздөгү жылдын 25-ноябрында жарыкка келди.
