БИШКЕК, 26-ноя. — Sputnik. Алты миллионунчу кыргызстандык болуп кыз бала төрөлдү. Ал Ош облусундагы аскер кызматкеринин үйүндө жарык дүйнөгө келди. Бул тууралуу президенттин маалымат кызматы билдирди.
Өкмөт башчы Темир Сариев президент менен жолукканда ымыркай кечээ саат 18.12де Алмаз Кожошев менен Рахат Белекованын үй-бүлөсүндө жарык дүйнөгө келгенин айтты. Ымыркай 3 килограмм 870 грамм болуп төрөлгөн. Эне-баланын абалы жакшы.
Президент ымыркайга жана ата-энесине чын ден соолук, узак өмүр каалады.
"Калктын өсүшү — тынч жашоонун эң негизги көрсөткүчтөрүнүн бири. Ошондой эле элдин жаркын келечекке болгон ишенимин билдирип турат", — деди Атамбаев.
Атамбаев ошондой эле, алты миллионунчу жаранга бир миллион өлчөмүндө депозиттик эсеп ачууну тапшырып, "мааракелик" ымыркай менен чогуу төрөлгөн он бөбөккө 100 миң сомдон тапшырууну буюрду.
