БИШКЕК, 1-дек. — Sputnik. "ФинансКредитБанктын" филиалы Sputnik агенттигине доллардын 78 сом деп бекиген баасын техникалык ката деп түшүндүрдү.
Буга чейин маалымат жыйында Улуттук банктын төрагасы Толкунбек Абдыгулов доллардын кунун аталган банктын филиалы өз алдынча жогорулатып жибергенин билдирген. Анын айтымында, 25-ноябрь күнү болжол менен саат 16.00дө аталган филиалдын казначейи жетекчилик менен кеңешип-кеспестен өзүм билемдик менен бир долларды 78 сомго баалап койгон. Ал учурда америкалык валютанын өз баасы 75 сомдун чегинде болчу.
"78 сом деп жазылган такта бир аз эле убакыт илинип турду. Банк мындай курсту расмий түрдө бекиткен эмес. Бул казначейдин техникалык катасы болду. Ал күнү доллар 74,9 сомдон сатылып жаткан", — деп айтышты банктан.
Мындан тышкары, учурда Улуттук банк тарабынан текшерүү жүрүп, ал эми айыпталып жаткан кызматкер иликтөө маалына жумуштан четтетилгени маалым болду.
