БИШКЕК, 30-ноя. — Sputnik. Кыргызстандын президенти Алмазбек Атамбаев Россиянын башчысы Владимир Путинге белгилүү кинорежиссер Эльдар Рязановдун өлүмүнө байланыштуу көңүл айтканын өлкө башчынын маалымат кызматы билдирди.
Рязанов дүйшөмбү күнү 89 жаш курагында дүйнөдөн кайтты.
"Советтер Союзу менен Россиянын залкар кинорежиссеру, СССРдин Эл артисти Эльдар Рязановдун өлүмү тууралуу кабарды кабыргам кайышып кабыл алдым. Маркум советтик кинематографиянын түзүлүшү жана калыптанышына ат көтөргүс салым кошкон. Ал бизге таланттардын тобун тартуулап, жараткан тасмалары бир нече муунду тарбиялап өстүрдү", — деп айтылат телеграммада.
Эльдар Рязанов — россиялык жана советтик кинорежиссер, сценарист, актер, педагог, теле алып баруучу, акын, драматург, продюсер, СССРдин Эл артисти. Анын "Старики-разбойники", "Невероятные приключения итальянцев в России", "Ирония судьбы, или с легким паром", "Служебный роман", "Вокзал для двоих", "Гараж" жана башка кинолору менен элге таанымал.
