БИШКЕК, 27-ноя. — Sputnik. Өкмөт башчы Темир Сариев жолдордун курулушуна арналган жыйында транспорт жана коммуникация министри менен Бишкек мэринин ишин кескин сынга алганын өкмөттүн маалымат кызматы билдирди.
Сариев шаар жана республикадагы көчөлөрдү куруу жана оңдоо иштерине бөлүнгөн каражат туура пайдаланылышы керектигин баса белгиледи.
"Иш сапаттуу жүрүп, өз мөөнөтүндө бүткөрүлүшү керек. Муну көзөмөлдөө транспорт жана коммуникация министри Аргынбек Малабаевдин түздөн түз милдети. Оңдолгон жолдорго дагы бир ирет көңүл буруп коюңуз. Керек болсо аң-чөнөктөрдү жамоо иштерин жүргүзүү зарыл", — деди премьер-министр.
Муну менен бирге өкмөт башчы Бишкектин муниципалдык кызматтары заманбап соода борборлоруна өтүүнүн ордуна айрым адамдарга павильон жана күркөлөрдө соода кылууга уруксат берип жатканын айтты.
"Шаар менен базарларды күркөлөрдөн тазалоо керек. Тазалыкты камсыздоо зарыл. Мындай аракетти эл деле колдойт, ишкерлерди башка соода орундары менен камсыздоо зарыл", — деди Сариев.
Өкмөт башчы 2016-жылы Кыргызстан эгемендигинин 25 жылдыгын белгилей турганын, Дүйнөлүк көчмөндөр оюндары өтөрүн, мындан улам бир катар мамлекеттердин башчылары республикага конок болуп келерин баса белгиледи.
