БИШКЕК, 22-ноя. — Sputnik. Ош аэропортунда бардык рейстер саат 17:00 гө чейин учпайт деп билдиришти "Манас" эл аралык аэропортунан.
Жекшемби таңда Россиянын Крансоярскисинен Ошко багыт алган учак аэропортто конуп жатып, кырсыкка учураган.
"Манас" эл аралык аэропортунан Оштогу болгон-бүткөн рейстердин бардыгы кечке чейин учпай тургандыгын айтышты.
"Алдын ала маалымат боюнча, учуп-конуу тилкеси саат кечки бештерге жакын ачылат", — деп айтышты "Манастан".
"Avia Traffic Company" фирмасына таандык болгон Боинг-737 учагы алгач, Красноярск – Ош рейси менен учуп, аба ырайынын бүркөлүп тургандыгынан түштүк борборго коно албай, Бишкекке келип түшүп, бирок Ошко учуп, конуп жатканда кырсыктаган. Анын канаты менен дөңгөлөгү талкаланып кеткен.
Алынган маалыматтарга караганда, ооруканага кайрылган алты адамдын экөө үйүнө жиберилген. Ооруканага жаткырылгандардын бири кош бойлуу аял.
