БИШКЕК, 22-ноя. — Sputnik. Бүгүн Оштогу аба майданында конуп жатып, кырсыкка учураган учактын жүргүнчүлөрүнүн ичинен ооруканага жеткирилген алты кишинин экөө үйүнө чыгарылды. Бул туурасында Ош облустук ооруканасынын Шайырбек Сулайманов Sputnik маалымат агенттигине билдирди.
"Жабыркагандардын арасында сынык-жаракат алгандар жок. Негизинен денесин оорутуп алгандар. Бир жерлерин сындырып алгандар жок. Алардын арасында балдар жок", — деди Сулайманов.
Ал учактын пилоту шаардык ооруканага жаткырылып, бир аз убакыттан кийин үйүнө коё берилгенин кошумчалады.
Бүгүн таңда Красноярск – Ош рейсинин учагы аба ырайынан улам, Бишкекке конууга аргамсыз болгон. Андан кийин учуп чыгып, Оштогу аэропортко конууга аракет кылганда, учуп-конуу тилкесинен чыгып кетип, кырсыкка учураган. Анын канаты менен дөңгөлөгү талкаланып кеткен.
Кырсыктаган Боинг-737 учагы "Avia Traffic Company" компаниясына таандык. Учакта 159 адам болгон.
