БИШКЕК, 19-ноя. — Sputnik. Нарын облусундагы Дыйкан — Кара-Кече унаа жолундагы 12 чакырымдык көпүрөнүн курулушунда кемчиликтер аныкталып, бул боюнча транспорт прокуратурасы тарабынан кылмыш иши козголгонун ИИМ билдирди.
Маалыматка ылайык, 2011-жылы Автоунаа жолдорун куруу башкармалыгы бир компания менен 6,3 миллион сомдук көпүрө куруу боюнча келишимге кол коет. Эки жылдан кийин эки ишкана менен үч тараптуу келишим түзүп, ага ылайык жалпы курулуш иши 4,2 миллион долларга бааланган.
2014-жылы аяктаган көпүрөнү Мамлекеттик экологиялык жана техникалык коопсуздук боюнча инспекция эксплуатациялоо үчүн кабыл алган.
Бирок текшерүү маалында көпүрөнүн курулушу долбоор талабына жооп бербей, аткарылган жумуш көлөмү жасалма жогорулатылган. Мындан тышкары, курулуш учурунда келтирилген материалдык зыян 2,4 миллион сомго жеткен.
Аныкталган кемчиликтерге карабай көпүрө инспекция тарабынан мыйзамсыз кабыл алынган. Мындан улам транспорт прокуратурасы тарабынан инспекция жетекчилигине карата кылмыш иши козголду.
