БИШКЕК, 19-ноя. — Sputnik. Мыйзамдарды инвентаризациялоодо бизнести жөнгө салуучу үч миңден ашуун ченемдик документтер аныкталганын премьер-министр Темир Сариев регулятивдик реформа боюнча кеңештин кезектеги жыйынында билдирди.
Өткөрүлүп жаткан регулятивдик реформа түптүү экономикалык реформага карай жасалган олуттуу кадам экенин белгилеген өкмөт башчы өлкөнүн инвестициялык абалын жакшыртуу, ишкердүүлүктү өнүктүрүү, бизнес үчүн жагымдуу шарттарды түзүүнүн, ошондой эле тоскоолдуктарды жоюунун маанилүүлүгүн айтты.
"Мыйзамдарды аткарууда бир катар кемчиликтер байкалууда. Алардын катарына бирин-бири кайталаган, карама-каршы келген жана юридикалык коллизияларга ээ мыйзамдар кирет. Реформанын алкагында мыйзамдарды инвентаризациялоо өткөрүлүп, натыйжада бизнести жөнгө салуучу 3 миңден ашуун ченемдик документтер аныкталган. Бул процесске 39 мамлекеттик орган тартылган. Мурунку жыйында жалпы укуктук актылардын тизмеси бекитилип, бардык мамлекеттик органдар 1-ноябрга дейре өз багыттары боюнча талдоо жүргүзүүсү тийиш эле", — деди Сариев.
Белгиленгендей, реформанын экинчи баскычы бизнеске багытталып, өзгөчө көңүл административдик процедураларды жакшыртууга бурулат.
Соңунда өкмөт башчы бардык мамлекеттик органдарга өздөрүнө тиешелүү багыттардагы иш планды үстүбүздөгү жылдын 20-декабрына чейин сунуштоону тапшырды.
