БИШКЕК, 17-ноя. — Sputnik. Түркиянын Гиресун шаарында улуу жазуучу Чыңгыз Айтматовдун элесине арналган "Ысык-Көлдөн Кара деңизге сапар алган Ак кеме" аттуу эл аралык илимий конференция өтүп жатканын Маданият, маалымат жана туризм министрлиги билдирди.
Кечээ башталган иш-чарада катышуучулар залкар инсандын чыгармачылыгынын Кыргызстандын маданиятына жана жалпы өнүгүшүнө тийгизген таасирин талкуулашты. Гиресун университети уюштурган конференцияга жазуучунун карындашы Роза Айтматова, уулу Аскар Айтматов жана жакын досу Мухтар Шаханов чакырылган.
Мындан тышкары, илимий конференцияга "Ак кеме" повестинин негизинде тасма тарткан режиссер Болот Шамшиев менен Улуттук илимдер академиясынын вице-президенти Абдылдажан Акматалиев да катышууда.
Иш-чара эртең, 18-ноябрь күнү аяктайт.
