БИШКЕК, 11-ноя. — Sputnik. Кыргызстанда өндүрүлгөн төө буурчакты Евробиримдик өлкөлөрүнө жана Түркия менен Индияга экспорттоо боюнча аракеттер көрүлүп жатканын Тышкы иштер министрлиги билдирди.
Төө буурчакка болгон төмөн баа дыйкандардын нааразычылыгын жаратып, аларды митингге чыгууга аргасыз кылган. Талас облусуна иш сапар менен барган өкмөт башчы жергиликтүү тургундар менен жолугуп, сүйлөшүүлөрдү жүргүзгөн.
Натыйжада премьер-министри Тышкы иштер министрлиги менен Экономика жана өнөр жай министрлигине төө буурчакты сатуу боюнча жаңы рынок табуу милдети жүктөлгөн.
Мындан улам ТИМ жетекчиси Эрлан Абдылдаев Кыргызстандын чет жактагы мекеме жетекчилерине Азия жана Европанын рыногуна эскпорттоого жигердүү аракет көрүү иштери тапшырылган.
Андан сырткары, кыргызстандык продукциянын потенциалдык мүмкүнчүлүктөрүн талдап чыгып, экспорт үчүн жаңы рынок издөө милдеттендирилди.
