БИШКЕК, 11-ноя. — Sputnik. Премьер-министр Темир Сариев бүгүн оперативдүү жыйында Тышкы иштер менен Экономика жана өнөр жай министрликтерине төө буурчактын баасын жогорулатуу боюнча жаңы базарларды табуу тапшырмасын берди. Бул туурасында өкмөт башчынын маалымат катчысы Бакыт Асанов билдирди.
Бул иштерди координациялоо милдети биринчи вице-премьер-министр Аалы Карашевге жүктөлдү.
Ошондой эле КРдин Түркиядагы элчисине төө буурчак сатып алуучу бардык ишканалар менен сүйлөшүүлөрдү өткөрүп, төө буурчактын баасын көтөрүү боюнча бардык аракетти көрүү тапшырмасы берилди
"Төө буурчактын баасын татыктуу деңгээлде сатуу боюнча өкмөт баардык чараларды көрөт. Бул жаатта мамлекеттик органдар өз ишинен жыйынтык чыгарышы керек", — деди Сариев.
Өкмөт башчы кечээ Талас облусуна болгон иш-сапарында төө буурчак, анын баасы жана сатылышы боюнча жергиликтүү дыйкандар менен сүйлөшүп, бул маселени оң жагына чечүүнү карай тургандыгын айткан.
