БИШКЕК, 11-ноя. — Sputnik. Евразия айдыңындагы туруксуздук АКШнын чырагына май тамызат, демек америкалыктарды "Ислам мамелкети" террористтик тобуна каршы күрөшүүгө чакыруу куру бекер убара экенин Саясий конъюктура борборунун башкы директору Сергей Михеев шейшемби күнү "Россия сегодня" Эл аралык маалымат агенттигинде өткөн Европа жана Азия медиаларынын форумунда билдирди.
"Бул бизге илээшкен дарт: Батышты анын чыныгы ээлеген ордунан жогору көрөбүз. Чынчыл, абийирдүү деп санайбыз. Чынында мындай сапаттарды биз өзүбүз ойлоп таап эле, Батышка ыйгарып койгонбуз. ИМ АКШ үчүн коркунуч эмес. Коркунуч экенин түшүнөт деп ойлоо да бекер. Бул Батыштын Украинадагы абалды түшүнгүсү келбегендей эле кеп", — деди Михеев.
Ал Россия бүтүндөй Батышты ИМге каршы күрөшүүгө чакырууну уланта берет, бирок мунун канчалык таасири болот деген суроо таштады.
"Европалыктар кепке келиши мүмкүн, америкалыктар менен сүйлөшүү — убакытты текке кетирүү", — деди Михеев.
Саясат таануучунун айтымында, америкалыктар учурда лидерлигин жоготуу коркунучу алдында турат.
"Лидерликти сактоонун бирден бир жолу — атаандаштарды алсыратуу. Буга кырдаалды туруксуздаштыруу менен жетишүүгө болот. АКШнын негизги атаандаштары Евразияда жайгашкан. Андыктан, Евразиядагы туруксуз абал АКШнын чырагына май тамызат", — деди ал.
Сөзүнүн аягында саясат таануучу атаандашты алсыратуу үчүн туруксуздукту жаратуунун бирден бир жолу — чындыкка дал келбеген фактыны ойлоп таап, анын айланасында маалымат кампания түзүү экенин билдирди.
