БИШКЕК, 10-ноя. — Sputnik. Премьер-министр Темир Сариев "Бишкек – Манас" Эл аралык аэропортуна барчу жолду оңдоо иштери менен таанышып, аны өз мөөнөтүндө жана сапаттуу бүткөрүү зарылдыгын билдирди.
"Бул жол борбор шаарыбызга киргендеги негизи жана мамлекеттик маанидеги жол. Аны оңдоодо комплекстүү түрдө иш алып барып, жергиликтүү бийлик жолдун эки тарабын көрктөндүрүүгө көңүл бурушу керек", — деди Сариев.
Транспорт жана байланыш министрлигинин маалыматы боюнча, узундугу 24 чакырымды түзгөн аталган жолду оңдоо долбоорлорунун баасы 954 миллион сом деп бааланган.
Учурда жолду ондоо иштери толук кандуу жүрүп жатат. Аны 2016-жылдын 20-августуна чейин бүткөрүү пландалууда.
Сариев "Манас" эл аралык аэропортунда жайгашкан "Кыргызаэронавигация" мамлекеттик ишканасына караштуу жаңы аэронавигациялык мунаранын абалы менен таанышты. Ошондой эле, аны ишке берүүнү тездетүүнү жана коопсуздугуна өзгөчө көңүл бурууну тапшырды.
