БИШКЕК, 9-ноя — Sputnik. Пакистандын түндүк-батышында урап калган фабриканын алдынан табылган кишилердин сөөгү 53кө жетти деп билдирди Ассошиэйтед Пресс жергиликтүү бийликке таянып.
Төртүнчү ноябрда Лахор шаарында ичинде 150гө жакын киши иштеп жаткан фабриканын төрт кабаттуу имараты урап түшкөн. Буга чейин кырсыктан өлгөндөрдүн саны 45ке жеткендигин маалымдашкан.
Алдын ала божомолдоолорго караганда, жакында эле Афганистанда 7,5 балл болгон жер титирөөдөн улам, имаратта жарака кетип, бирок, тирөөчтөрү туруштук берген. Азыр кырсыктын себеби иликтелип жатат.
Афганистанда катталган жер титирөө коңшу мамлекеттерге да кесепетин тийгизди. Пакистанда 228 киши каза болсо, Афганистандын өзүндө каза болгон кишилердин саны 63 кишиге жетти. Жер алдындагы силкинүү Кыргызстанда, Азербайжанда жана Казакстанда да сезилген.
