БИШКЕК, 5-ноя. — Sputnik. Жаңы бекиген министрлерге 10-ноябрга чейин жеке иш планын даярдоону премьер-министр Темир Сариев өкмөттүн жумушчу жыйынында тапшырды.
Премьер-министр жаңыдан бекитилген өкмөт мүчөлөрүнүн ишине ийгилик каалап, өзүнө чоң жоопкерчилик жана милдетти алганын белгиледи.
"Элдин жана парламенттин алдында чоң жоопкерчиликти өз моюнубузга алдык. Өкмөттүн бул курамынан чоң нерселер күтүлүүдө. Ошондуктан, натыйжалуу ишти уюштурушубуз керек", — деди Сариев.
Премьер-министр дүйнөдө жана аймактагы экономикалык абал татаал болуп жатканын белгилеп, өкмөт өз ишин азыркы шартка байланыштуу ыкчам жана мобилдүү алып баруусу керектигин кошумчалады.
Ошондой эле өкмөт өз программасында камтылган иш-чараларды тез арада аткарып, антикризистик аракетти күчөтүшү керектигин, ар бир өкмөт мүчөсүнө талап күчөтүлүп, тартипке өзгөчө көңүл буруларын эскертти.
Ошондой эле ар бир министрлик 10-ноябрга чейин ар бир министрдин жеке иш планын даярдоосу тийиш, Экономика жана өнөр жай министрлигине он күндүн ичинде өкмөттүн программасынын негизинде иш-план иштеп чыгууну, ошондой эле тиешелүү министрликтерге бир айлык мөөнөт ичинде балдарга карата зомбулукка каршы жазаларды катаалдантуу боюнча мыйзамдарга өзгөртүү киргизүү тапшырмасын берди.
Мындан тышкары, ар бир мамлекеттик органга чыгашаларын азайтып, кыска мөөнөт ичинде оптимизациялоо боюнча иштерди активдештирүүнү тапшырды.
