БИШКЕК, 5-ноя. — Sputnik. Жолдордогу айдоочулук тартипти жакшыртуу максатында Жол кайгуул кызматы бир катар алдын алуучу иш-чараларды өткөрүп жатканын аталган мекеме билдирди.
Маалыматка ылайык, акыркы убакта мамлекеттик кызматтардын, дипломатиялык номерлүү жана коомдук унаалардын айдоочулары тарабынан жол эрежесин бузуу тууралуу жарандар соцтармактар аркылуу абдан көп кайрылууда.
Мындан улам Жол кайгуул кызматы өкмөттүн, дипломатиялык жана консулдук, ошондой эле коомдук унаанын айдоочулук курамы менен жолугуп, жол кырсыгынын алдын алуу, айдоочулук тартип, жол эрежелерин сактоо тууралуу семинарларды өткөрүп жатат. Анда кызуу талкуу жүрүп, оор кесепеттерге алып келген жол кырсыктарынын видео жыйнагы көрсөтүлдү.
Мекеме мындай аракет ар бир айдоочунун жоопкерчилигин арттыра турганын белгилейт.
