БИШКЕК, 5-ноя. — Sputnik. Талас облусунун Бакай-Ата районунун Ак-Дөбө айылындагы Теодор Герцен атындагы музейде "Немистер Кыргызстандын тарыхында" деп аталган көргөзмө ачылат. Бул туурасында "Роза Отунбаеванын демилгеси" фондусунун сайтында маалымдалды.
"Максат — элге жана дүйнө коомчулугуна Кыргызстандагы немистердин тарыхын, алардын өлкөнүн экономикасы менен маданиятынын өнүгүшүнө кошкон салымын көрсөтүү. Андан сырткары интеграциянын мындан аркы жолун, Кыргызстан менен Германиянын кызматташуусун чагылдыруу", — деп айтылат маалыматта.
Көргөзмөнүн экспозициясы ХIХ – ХХ кылымдардын экинчи жарымында Кыргызстандагы тарыхый процесстерди чагылдырат. Андан сырткары Кыргызстандын тарыхы үчүн баа жеткис мааниге ээ салым кошкон немис инсандар туурасында болот.
"Көргөзмөнүн экспозициясы илимий коомчулуктун өкүлдөрүндөй эле кеңири коомчулук, өзгөчө, балдар үчүн кызыктуу", — деп айтылат билдирүүдө.
Кичинекейлер үчүн интерактивдүү иш-чаралар даярдалып, музейдин тажрыйбалуу педагогдору немис маданияты туурасында айтып беришет.
