БИШКЕК, 23-окт. — Sputnik. 50-түрмөдөн кылмышкерлердин качуусу боюнча козголгон кылмыш ишинин алкагында тергөө Т.М.Д. аттуу жарандын изине чыгып, үйүндө тинтүү жүргүзүлгөнүн ЖАМК билдирди.
Текшерүү учурунда үйдөн террорчулар жардырууга ниеттенген ЖАМКтын түзөтүү колонияларынын схемалары табылган. Мындан тышкары, колго жасалуучу жардыргыч заттардын түзүлүштөрү, жардыруучу заттарды ишке киргизе турган каражаттар бар экендиги белгилүү болгон. Муну менен бирге диний адабият жана кол салып, денеге залал келтирүүчү куралдар табылган.
Өткөн аптанын башында 50-түрмөдөн тогуз кылмышкер качып, анын бешөө кармалган. Аларды токтотууга аракет кылган ЖАМКтын үч кызматкерин өлтүрүп, дагы бирин оор жарадар кылган. Ал беш күндөн кийин эсине келбей жатып каза болгон.
Качып кеткен төрт кылмышкердин экөө жок кылынып, бутунан жарадар болгон дагы бири учурда ооруканада дарыланып жатат. Эркиндикте калган акыркы кылмышкер Алтынбек Итибаев кечээ атайын операциянын натыйжасында өлтүрүлдү. Атышуу учурунда милициянын капитаны Төлөбек Исмаилов курман болуп, дагы бир жоокер жаракат алган. Мындан тышкары, эки жай тургун октон көз жумган.
