БИШКЕК, 21-окт. — Sputnik. Талас облустук администрациянын алдына митингге чыккандар менен өкмөттүн облустагы өкүлү, айыл чарба министринин орун басары жолугуп сүйлөштү. Бул тууралуу Талас ОИИБдин маалымат кызматы билдирди.
Дыйкандардын айтымында, 2013-жылкы түшүмдүн баасы 100 сомдон ашкан, 2014-жылы төө буурчактын баасы 60 сомго чейин түшүп кеткен. Бүгүнкү күнү анын баасы 25-30 сомдон сатылууда. Буга нааразы болгон дыйкандар шаршемби күнү обладминистрациянын алдына митингге чыгышкан.
Милициянын маалыматына ылайык, митинг учурунда эч кандай мыйзам бузуу катталган эмес. Нааразы болгондор түштөн кийин саат 3:30дарда тарап кетишкен.
"Нааразы болгондор менен айыл чарба министринин орун басары да жолукту. Алар маселени өкмөткө жеткирмей болушту. Ошондой эле республикалык комиссия түзүлмөкчү", — деп ОИИБден маалымдашты.
Төө буурчактын баасын атайын төмөндөткөн ортомчулар мыйзам чегинде жооп бере турганын премьер-министр Темир Сариев билдирген эле.
