БИШКЕК, 21-окт. — Sputnik. Талас облусунун дыйкандары төө буурчактын баасы арзан болуп атканына нааразы болуп митингге чыгышты. Бул тууралуу Талас ОИИБдин маалымат катчысы Максат Абдысейитов Sputnik агенттигине билдирди.
Дыйкандардын айтымында, 2013-жылкы түшүмдүн баасы 100 сомдон ашкан, 2014-жылы төө буурчактын баасы 60 сомго чейин түшүп кеткен.
"Учурда өкмөттүн Талас облусундагы өкүлү Байыш Жуманазаров митингге чыккан 450дөй киши менен музыкалык мектептин ичинде жолугуп жатат", — деди ал.
Жергиликтүү дыйкандардын айтымында бүгүнкү күнү Таласта төө буурчак 25-28 сомдон сатылууда. Бул баа дыйкандардын кеткен мээнетин толук актабайт дейт алар.
Төө буурчактын баасын атайын төмөндөткөн ортомчулар мыйзам чегинде жооп бере турганын премьер-министр Темир Сариев билдирген эле.
