БИШКЕК, 19-окт. — Sputnik. Төө буурчактын баасын атайын төмөндөткөн ортомчулар мыйзам чегинде жооп бере турганын премьер-министр Темир Сариев билдирди.
Аталган жетекчилер төө буурчактын баасына байланыштуу жагдайды териштирип, дыйкандарга түшүндүрүү иштерин жүргүзөт.
"Төө бурчактын баасын атайлап төмөндөткөн ортомчулар аныкталса, мыйзам чегинде жоопкерчилигин кароо зарыл", — деди Сариев.
Премьер-министр базар экономикасынын шартында айыл чарба продукцияларына бааны рыноктук суроо-талап аныктарын жана учурда коңшу өлкөлөрдө да айрым айыл чарба продукцияларынын баасы төмөндөп жатканына көңүл бурууну эске салды.
"Кыргыз өкмөтү айыл чарба өндүрүүчүлөрүн, дыйкан-фермерлерди колдоо жаатында жана өндүргөн продукцияны жогорку баада сатылышына шарт түзүү боюнча аракетти көрүп жатат", — деди өкмөт башчы.
Анын айтымында, бул багытта жеңилдетилген насыялар жана айыл чарба техникалары менен камсыз кылуу жана айыл чарба өндүрүмдүүлүгүн жакшыртуу боюнча жаңы ыкмаларды дыйкандарга жайылтуу жаатында иш алып барууда.
