БИШКЕК, 15-окт. — Sputnik. Мексиканын Коомдук билим берүү министрлиги өлкө боюнча массалык нааразылык акцияларына катышуу үчүн ишке чыкпай калган 85 миңден ашуун мугалимге бир күндүк эмгек акынын көлөмүндө айып салары туурасында шаршемби күнү билдирди.
Билим берүү тармагынын кызматкерлери 12-октябрь күнү өлкөнүн бир нече штатында нааразылык акцияларын уюштуруп, жүз миңдеген окуучуларга сабак өтүлгөн эмес. Мугалимдердин профсоюздары өлкөдөгү билим берүү реформасына каршы чыгууда.
Аталган министрликтин маалыматы боюнча, өлкөнүн 14 штатынын мугалимдерине айып салынды.
Эми алар өз укуктарын коргоого жасаган аракеттери үчүн таман акы, маңдай тери менен тапкан каражатынан ажыроого аргасыз. Болгондо да, Мексиканын бийлиги ишти калтыргандарга карата айып жазасы сөзсүз колдонулушуна көз сала турганын билдирди.
