БИШКЕК, 9-окт. — Sputnik. Райондук ички иштер бөлүмүнүн имаратына кишини алып келип, аны күнөөсүн моюнуна алдырыш үчүн бөйрөгү жарылганча сабады делген үч милиция кызматкеринин кылыгы такталып жатканын Чүй ИИББдин маалымат кызматы билдирди.
Башкы прокуратурадан билдиришкендей, Ысык-Ата РИИБдин үч кызматкери кармалган кишиге күнөөнү моюнуна алдырыш үчүн бөйрөгү жарылганча сабагандыктан аларга карата кылмыш иши козголгон.
Аталган фактыны Чүй ИИББи тактап жатканын маалымат кызматынан белгилешти.
"Кандай тергөө иштери боюнча кайсы кишини алынып келгени тууралуу маалыматтарды тактап жатабыз. Бул факты боюнча кызматтык иликтөө болуп же болбогонун да териштиребиз", — деп билдирди Чүй ИИББдин маалымат кызматы.
Жабырлануучунун арызынын негизинде аталган факты боюнча үч милиционерге Кылмыш жаза кодексинин "кыйноо" беренеси боюнча кылмыш иши козголду.
