БИШКЕК, 9-окт. — Sputnik. Малдын асыл тукумдуулугун жогорулатуу жана үрөндүн сапатын жакшыртуу боюнча кескин чараларды көрүү зарылдыгын премьер-министр Темир Сариев асыл тукум жана үрөнчүлүк чарбаларынын ишин жакшыртууга арналган жыйында билдирди.
Өкмөт башчы Кыргызстанда малдын туягы көбөйгөнү менен анын асыл тукумдуулугу жана өлкөдө себилип жаткан үрөндүн сапаты начарлап кеткенин, бул жаатта Айыл чарба жана мелорация министрлиги жетиштүү иш алып бара албай жатканын белгиледи.
"Өлкөдө айдоо аянттары чектелүү болгондуктан, анын көлөмү боюнча башка өлкөлөр менен атаандашуу кыйын. Бирок сапаттуу, жогорку түшүмдүү үрөндү жайылтууга мүмкүнчүлүк бар. Бул үчүн Айыл чарба жана мелорация министрлиги жеке чарбалар менен тыгыз иштеп, түшүндүрүү иштерин күчөтүүсү зарыл. Мындай жагдай малдын асыл тукумдуулугун арттыруу тармагына да тиешелүү", — деди Сариев.
Муну менен бирге премьер-министр малдын асыл тукумдуулугун артыруу боюнча жасалма уруктандырууга өтүү жана аны жайылтуу багытында иштерди күчөтүүнүн маанисин белгиледи.
Ал эми үрөнчүлүк багытында өлкөдөгү кант, сүт жана пахтаны кайра иштетүү заводдору менен биргеликте дыйкандардын ортосундагы кызматташтыкты бекемдөө боюнча механизм иштеп чыгуу жана дыйкан-фермерлер үчүн атайын окутууларды уюштуруу тапшырмасын берди.
