Карыларды кароосуз калтырып, акаарат келтирсе алардын кусуру уруп, каргышы тиет деди кыргыз эл акыны Шайлообек Дүйшеев.
Анын айтымында, жылына бир жолу эскерилген карыларга ошол эле күнү көңүл бурулуп, жылдын калган мезгилинде алар унутта калат. Болбосо, таптакыр керек-жарактан чыккансып, карылар үйүнө өткөрүлөт.
"Жашың өткөндө гана адамдын өмүрү кымбат экенин, ал аябай кыска экенин туят экенсиң. Колуман келсе, карылар үйлөрүн таптакыр жоюп салат элем. "Карылар жылы" дебей, "Багуусуз калган карыларсыз жыл" деп чакырык таштасак сонун болгон турат. Улгайган адамдарды канчалык сыйласак, өзүбүздү ошончо сыйлаган болобуз", — дейт акын.
Бүгүн дүйнө Улгайгандардын эл аралык күнүн белгилеп жатат.
