БИШКЕК, 26-сен. — Sputnik. Жол кайгуул кызматынын (ЖКК) инспекторлору "Крутой" рейдин уюштурушканын ИИМдин ЖККсы билдирди.
Маалыматка ылайык, бул рейддин уюштурулушуна Жалпыга маалымдоо каражаттарында жол эрежесин бузган кымбат машиналар тууралуу чыккан кабарлар себеп болгон.
Жума күнү Бишкек шаарынын аймагында жүргөн рейд учурунда 89 жол эрежесин бузуу аныкталган.
Терезесин караңгылатып алып жүргөн 19 учур, ылдамдыкты жогорулаткан 12 учур жана жасалма номер менен машина айдап жүргөн бир факты катталган. Андан сырткары, 10 айдоочу документи жок жүргөн.
"Рейд учурунда инспекторлордун буйругуна баш ийбегендерди артынан кууп токтотууга туура келди. Кызматкерлерди коркуткан айдоочулар да кездешти", — деп айтылат Жол кайгуул кызматы тараткан билдирүүдө.
Мындай рейддер эми такай өткөрүлөрүн мекемеден белгилешти.
