БИШКЕК, 26-сен. — Sputnik. Кыргызстандын ЕАЭБге кошулушу менен эмгек мигранттары Россиянын чет-жакасында бир топ тоскоолдуктарга туш болуп жатканын эмгек, миграция жана жаштар министри Айбек Азыранкулов Новосибирскиде аймак жетекчилиги менен жолугуу учурунда билдирди.
Новосибирскиде министр Кыргызстан менен Россия президенттери тарабынан бир катар келишимдерге кол коюлганын, алар борбордо аткарылганы менен чет жактардагы аймактарда ишке ашпай жатканын эскертти.
"Кыргызстандык мигранттар региондордо Федералдык миграция кызматынан тышкары, Ички иштер министрлиги, Чек ара кызматы тарабынан кыйынчылыктарга туш болуп жатышат", — деди министр.
Жолугушуу учурунда "кара тизмеден" алынган мигрант Россияга кире албай калган учурлар болуп жатканы айтылды.
Федералдык чек ара кызматынын өкүлү бул техникалык мүчүлүштүк экенин белгиледи.
"Мигрант мыйзамдашуу максатында Россиядан чыгып, кайра 1-1,5 саат аралыгында кайтып келип жатышат. Бул кыска убакыт аралыгында тийиштүү маалымат чек арачылардын базасына түшүп жетишпейт", — деди өкүл.
Учурда Россия аймагында жүрүүгө мындан үч жыл мурун тыюу салынган 2289 кыргызстандык жарандын 859уна жол ачылган. Калган мигранттарга белгиленген мөөнөттүн өтүшү менен уруксат берилет.
