БИШКЕК, 23-сен. — Sputnik. Шейшемби күнү Пентагон "Ислам мамлекети" менен "Аль-Каида" топторунун эки башчысы жок кылынганын ырастады.
18 Аяк оона 2015, 16:32
Улуту боюнча француз Давид Дружон 5-июлда коалиция Алеппого абадан сокку урганда өлгөнүн Пентагондун өкүлү Питер Кук билдирди. Дружон "Аль-Каиданын" курамына кирүүчү "Хорасан" тобунда жардыруучу заттар боюнча эксперт болчу. Ошондой эле Дружон батыш өлкөлөрүнө кол салууну пландап, террористтерди окутуу менен алектенген деп эсептейт Пентагон.
Каза болгондордун экинчиси — Абу-Бакр аль-Туркмани, "Ислам мамлекетинин" лидерлеринин бири, Ирак аскеринин мурдагы подполковниги. Ак үйдүн өкүлү Жош Эрнест Пентагондун билдирүүсүн тактап, аль-Туркмани 10-сентябрда Иракта өлтүрүлгөнүн айтты.
"Аль-Туркмани "Ислам мамлекетине" кошулганга чейин Иракта "Аль-Каиданын" жихадчыларына иштеген", — деди Эрнест.
Анын айтымында, аль-Туркманинин өлүмү "Ислам мамлекетинин" Мосулдагы жана Ирактын Таль-Афарындагы операцияларына тоскоолдук жаратып, ошондой эле террористтердин "эркин аракеттерин" кыйындатат.
АКШ жана бир катар башка өлкөлөр 2014-жылдан бери Сирия менен Ирактын аймагында "Ислам мамлекети" тобуна каршы абадан сокку уруп келет, алардын чабуулуна "Хорасан" тобу да дуушар болгон учурлар бар.
