БИШКЕК, 11-cен — Sputnik. Мындан он төрт жыл мурда террористтер АКШда төрт учакты басып алып, Нью-Йорк шаарындагы Дүйнөлүк соода уюму жайгашкан эгиз мунараларга эки учак келип урунган. Бул терактыдан кийин дүйнөдө коопсуздук, идеологиялык үстөмдүк маселеси курчуду.
Бул жаатта коопсуздук боюнча эксперт, атайын кызматтардын отставкадагы полковниги Талант Разаковдун пикирин билдик. Эксперт 11-сентябрдагы террактыдан кийин дүйнө кандай жакка өзгөргөнүн, үстөмдүк менен жасалган АКШнын кадамдары кандай кесепеттерге алып келгенине токтолду.
"Иракта Саддам Хусейнди жок кылабыз деп, аягы эмне болду? Анын ордуна канчалаган ар кандай террористтик уюмдар жаралды. Кезегинде андайларды ошол Саддам Хусейн тосуп турган. Америка Иракка киргенде Россия да катуу сынга алган. Муну бекер кылып жатасыңар деген РФ президенти Владимир Путиндин "вы ведете себя как слон в посудной лавке" (силер идиш саткан дүкөндөгү пилдей болуп жатасыңар) деп айтканы бар. Ал эми дагы бир мамлекет Ливиянын азыркы тагдыры эмне болду? Кезегинде ал жерде уруу-уруу болуп жашаган арабдардын башын бириктирип, ийкемге келтирип турган полковник Мухаммед Каддафи болучу. Азыркы абалды өзүңөр көрүп жатасыңыр. Америка "бекер кылыптырбыз" деп, Каддафинин сөзүн эми эстеп жатышат", — деди Разаков.
Эксперттин пикиринде коомчулуктун үшүн алган терроризм ага каршы туруу үчүн бир топ мамлекеттердин башын бириктирди. Бирок, анда да "чаап алуучулук" ыкмалары кездешип жаткандыгын айтат.
Дүйнөдө терроризмге каршы мамлекеттер бирикти, ШКУ, ЖККУ, Коалициялык күчтөр пайда болду.
Террорчулуктун тамырын кесүү максатында жасалган басып алуучулук саясаттан улам, бир нече өлкөлөр мамлекеттин бүтүндүгүнөн ажырады, жарандары чилдей тарап, көбү качып-бозуп кетти. Ал эми учурда терроризм боюнча ири державанын долбоору деп айтылып келген "Ислам мамлекети" дүйнөгө кооптуулук жаратып, миңдеген адамдарды качкынга айланып, суу жээгинен табылган наристе өлүктөрүнүн көбөйүшүнө алып келип жатат.
