БИШКЕК, 3-сен. — Sputnik. Кыргызстандын футбол боюнча курама командасы оюн талаасында чабуул менен бирге мыкты коргонууну да көрсөтө турганын команданын башкы машыктыруучусу Александр Крестинин билдирди.
Маалымат жыйынында Крестинин бул оюн машыгуулардын кандай деңгээлде өткөнүн көрсөтөрүн белгиледи. Муну менен бирге машыктыруучу турнир жаңы гана башталганын, демек командалардын баары тайпадан чыгып калышы мүмкүн экенин кошумчалады.
"Иорданиянын курама командасы — акыркы жылдары мыкты көрсөткүчтөргө жетишкен күчтүү атаандаш. Анын чабуулу да, коргонуусу да терең ойлонулган. Оюн абдан оор болот", — деди Крестинин.
Кыргызстандык команданын оюнчусу Эдгар Бернхардт машыктыруучу штаб даярдык үчүн бардык мүмкүнчүлүктөрдү түзүп бергенин айтты.
2018-жылы Россияда өтө турган дүйнө чемпионатынын тандоо турунда Кыргызстан Бангладеш, Тажикстан, Иордания жана Австралия менен бир тайпада ойнойт.
