БИШКЕК, 27-авг. — Sputnik. Бүгүнкү күндө Лионель Месси менен Криштиану Роналдунун кимиси мыкты оюнчу деген суроонун айланасында интернет түйүндөрүндө кадимкидей кызыл чеке болуп талкуунун жүрүшү кадыресе көрүнүш болуп калды. Далил катары күйөрмандар сүйүктүү оюнчу катышкан оюндарды, уткан кубокторун санап, керек болсо кимдин кантип гол киргизгенине чейин сүрөттөп беришет.
Мыкты оюнчу наамына аргентиналык "Барселонанын" чабуулчусу Лионель Месси, Мадриддин "Реалынын" чабуулчусу Криштиану Роналду жана "Барса" командасынын форварды Луис Суарес талапкер болууда.
Аталган оюнчулар 10 футболчунун ичинен тандалып алынган. Ал эми мыкты оюнчулардын тизмесине алгач 35 оюнчу киргени айтылууда. Мыкты оюнчуну салтка айлангандай УЕФАнын бардык улуттук ассоциацияларынын өкүлдөрү болгон журналисттерден турган калыстар тобу аныктайт.
Командалардын жетишкендиктерине көз жүгүртсөк, Суарес менен Месси "Барса" командасынын курамында Чемпиондор Лигасынын жеңүүчүсү, Испаниянын чемпиондору катары таанылып, аталган өлкө падышасынын кубогуна ээ болушкан. Ал эми Роналду өткөн жылдын мыкты европалык оюнчусу деп табылган. Быйыл Роналду курамына кирген "Реал" командасы Чемпиондор Лигасынын жарым финалынан жана Король кубогу үчүн беттештин жарым чейрек финалында оюндан чыгып калган.
Теңкелбес Мусаев, Кыргызстандын футбол боюнча Улуттук курама командасынын менеджери:
— Менин баамымда, бул наамга быйыл Лео Месси ээ болот. Ал анын командасы өткөн сезондо үч ирет баш байгени багынтканы үчүн деле татыктуу да. Экинчиден, оюндарда Мессинин салымы ошол эле Суарезске караганда бир топ салмактуу болду. Бирок, чынын айтсам, Месси менен Роналдунун атаандаштыгы тажатып жиберди. Бул таймашта Суарес мыкты деп табылып калса бир кызыкты жаратмак. Тилекке каршы, эки оюнчунун чеберчилиги башка футболчуларга караганда төөлүк өйдө болуп жатат.
Максат Кудайбердиев, "Супер-Инфо" гезитинин спорт кабарчысы:
Эрнис Осмонбаев, ИИМ маалымат кызматынын ага инспектору:
— Луис Суарес башкаларга караганда бул наамды алууга көбүрөөк укуктуу. Жаракаттарына жана атаандашын тиштеп алганы үчүн оюн талаасына төрт айга чейин чыгуусуна тыюу салынганына карабай бир топ ийгиликтерди жаратты. Анын үстүнө, ал "Барсада" бир жылдан бери эле ойноп жатпайбы.
Игорь Шестаков, саясат таануучу:
— Албетте, Месси! Бирок, менин пикиримде ушу тапта мыкты футболчу катары Барселонанын чабуулчусу Неймарды атаар элем. Бүгүнкү күнү Роналду менен Месси кандайдыр бир деңгээлде рекламалык брендге айланып калды. Ал эми Неймар Пеле сыяктуу чеберчилиги менен дүйнөдө бразилиялык футболчулар мыкты экенин далилдеп жатат.
Акеля Жумалиева, "Абдыш-Ата" клубунун экс-футболчусу:
— Месси! Ал өткөн сезондо командасы менен биргеликте үч кубокту багындырып, "Барсанын" мыкты оюнчусу болуп эсептелет. УЕФАнын супер кубогу үчүн Севилья менен болгон оюнунда эки айып тобун киргизбедиби. Ал эми тизмеге кирбеген футболчулардын ичинен каталониялыктардын жарым коргоочусу Андрес Иньестуну белгилемекмин.
Кубанычбек Табалдиев, "Кабар" улуттук маалымат агенттигинин директору:
Акыркы төрт жылдын аралыгында "Мыкты Европа футболчусу" наамына Лионель Месси, "Барса" (2011), Андрес Иньеста, "Барса" (2012), Франк Рибери, "Бавария" (2013) жана Криштиану Роналду, "Реал" (2014) ээ болушкан.
Европанын мыкты футболчу айымы наамына франциялык Амандин Анри жана эки германиялык Женифер Марожан менен Селия Шашич ат салышууда. Айымдар арасындагы жеңүүчү да бейшемби күнү добуш берүү аркылуу аныкталат.
