БИШКЕК, 25-авг. — Sputnik. Билим берүү жана илим министри Элвира Сариева Жогорку Кеңешке шайлоого катышпоону чечти. Бул туурасында министрликтин маалымат кызматы билдирди.
Дүйшөмбү күнү Элвира Сариева партия аны колдоп, шайлоого баруучу талапкерлердин тизмесинде 16-сапка койгонун айтты.
"Бирок менин командам билим берүү системасында ишин жаңы гана баштап, ишибиздин алгачкы системалык жыйынтыктары пайда боло баштады. Мындайды буга чейин эч ким жасаган эмес. Мен кетпейм деген пикиримде калам", — деди Сариева.
Анын айтымында, окуу жылынын башталышы менен жогорку окуу жайларда, илимий жааттажасала турган өзгөртүүлөр абдан маанилүү болуп турат. Бул боюнча саясий чечимдер кабыл алынган.
"Баштаган ишимди аягына чейин чыгарам", — деди министр.
Парламенттик шайлоо 2015-жылдын 4-октябрына пландалган. КСДП өткөн жуманын аягында депутаттыкка талапкерлердин тизмесин БШКга тапшырган.
