Эрнис Турсуновдун замандашы, жазуучу, драматург Мар Байжиев аны менен тыгыз байланышта болгонун айтат.
"Биздин байланыш өтө терең эле. Анткени Эрнистин атасы менен менин атам чогуу иштегендиктен, үй-бүлөбүз менен да катташып турчубуз. Кийин университетте окуп калдык, ал менден бир-эки курс жогору окуду. Экөөбүз чыгармачылык жактан да, тиричилик жактан да байланышта болчубуз. Кандай гана болбосун, бир-бирибиздин чыгармаларыбызды окуп, талкуулап, ой-пикирибизди айтчубуз", — дейт ал.
Байжиев ошондой, анын котормочу катары жасаган эмгектери эбегейсиз экенин айтып, кыргыз эли таланттуу уулунан ажырады деп кошумчалады.
"Триумф жана трагедия"
Кыргыз эл артисти Дарика Жалгасынова Эрнис Турсунов менен биргеликте "Триумф жана трагедия" аттуу китепти кантип жазып калганын мындайча айтып берди.
"Бир убактарда өзүбүздүн профессионал ырчылар тууралуу баяндаган "Мезгил жана музыка" деген программаны алып барып калдым. Агайдын да "Асылдар ааламы" деген берүүсү бар эле. Аларды да көрүп, угуп жүрчүмүн. Агай жакшы нерсени көрсө аны байкап, өзүнүн пикирин билдирген жан эле. Бир жолу "Сенин программаңды көрдүм, абдан жакшы. Ошондо айтылгандарды китеп кылып жазбайлыбы" деп калды. Мен "агай сиз деген чоң акынсыз, жазуучусуз. Сиз менен чогуу китеп жазууга колум барбай атат, сиздин жаныңызда өзүмдү алсыз сезип атам" десем, "жок, сенин жазып жүргөн ырларың абдан жакшы, антпей, чогуу китеп жазалы" деди. Ошентип жакшы китеп чыгып калды", — дейт ал.
Китептеги Опера жана балет театрындагы профессионалдар тууралуу Дарика Жалгасынова жазса, драма театрындын чыгаандары жөнүндө Эрнис Турсунов жазган.
Турсунов орустун белгилүү акындары Александр Пушкин, Николай Некрасов, Сергей Есениндин ырларын да кыргызчалаган.
Анын "Айчырайлуу кыздар", "Чындык ийилет, бирок сынбайт", "Замандаш", "Байтик баатыр", "Эрки күчтүүлөр "драмалары өлкө театрларынын сахналарында чоң ийгилик менен коюлган.
