БИШКЕК, 24-авг. — Sputnik. Кыргызстан адам капиталы боюнча дүйнөдө 44-орунду ээлегенин Улуттук стратегиялык илимий институту билдирет.
Маалыматка ылайык, изилдөө Дүйнөлүк экономикалык форум тарабынан Mercer компаниясы менен биргеликте жасалып, адам капиталынын өнүгүшү туурасындагы жылдык отчетунда жарыяланган.
Мында мамлекеттер адам капиталынын индекси — жашоо деңгээли, сабаттуулугу, билим деңгээли, калктын жашоо узактыгы болуп жалпысынан 46 көрсөткүч боюнча каралат.
Кыргызстан 124 өлкөнүн ичинен 44-орунду ээлеп, жогорку көрсөткүчтүү мамлекеттердин 35 пайызына кирген. Мында Россия 26-орунда, Казакстан 37-орунда турат. Изилдөө боюнча адам капиталынын жогорку көрсөткүчү Финляндияда катталган. АКШ 17-орунда турса, Германия 22-орунду ээлеген.
