БИШКЕК, 20-авг. — Sputnik. Кинематографты өнүктүрүү фонду 23-27-август күндөрү Бишкек менен Бостериде V автордук кинофестивалын өткөрө турганын Sputnik агенттигине аталган фонд билдирди.
Фестивалдын ачылуу аземинде Чехиянын Карловы Вары шаарында өткөн 50-эл аралык кинофестивалда дүйнөлүк премьерасы өткөн Мирлан Абдыкалыковдун "Сүтак" тасмасы көрсөтүлөт.
Иш-чаранын алкагында 27-август күнү Чыңгыз Айтматов атындагы Кино үйүндө голландиялык жана кыргыз кинематографисттери тарабынан тартылган "Курай-Курай" фильми тартууланат.
"Тасманы продюсер Денис Васлин менен режиссер Марьолейн Бунстра тааныштырат", — деп айтылат билдирүүдө.
Мындан тышкары, 28-август күнү Кино үйүндө кинотаануучу Игорь Гуськов Ирандын "Бүгүн" жана Калмыкиянын "Ак чардактар" тасмасын тартуулайт.
Кинофестивалга ардактуу конок катары Улуу Британиянын, Франциянын киносынчылары менен кинотаануучулары, Түштүк Кореядан эксперттер, Голландия, Казакстан, Өзбекстан жана Тажикстандан режиссерлор чакырылган.
