БИШКЕК, 19-авг. — Sputnik. Кыргызстанда иттерди эхинококкозго каршы эмдөө башталганын Айыл чарба жана мелиорация министрлигинин байланыш боюнча адиси Ирена Байтанаева билдирди.
Статистикалык комитеттин маалыматы боюнча, Кыргызстанда кароосуз калгандарды эсепке албаганда 500 миң ит катталган. Аларды эхинококкозго каршы дарылоо боюнча иш-чаралар Кыргызстандын бардык булуң-бурчунда жүргүзүлүүдө. Эмдөөнү райондук ветеринардык инспекция менен келишим түзгөн жеке ветеринарлар жасап жатат. Талапка ылайык, бул процедура квартал сайын өткөрүлүп турушу кажет.
Маалыматка ылайык, ветеринарлар иттерди идентификациялоо иш-чарасын кошо жүргүзүп, жаныбардын ээсине ветеринардык китепче тапшырууда. Иттин сол кулагына сыя менен номер жазылат, ал китепчеге түшүрүлүп, ветеринардык кызматта сакталат. Бул керек учурда ит тууралуу бардык маалыматты алууга мүмкүнчүлүк түзөт.
Иттерди дарылоо жана идентификациялоодон тышкары, иш-чаралардын комплексинде эхинококкоздун алдын алуу боюнча калкка маалымат берүү да каралган.
КРдин "Ветеренария жөнүндө" жаңы мыйзамына ылайык, ооруну таратышы мүмкүн болгон жаныбарларды дарылоодон баш тарткан жарандар администрациялык же кылмыш жообуна тартылат.
Эхинококкоз – боор, өпкө жана башка органдарда пайда болуучу гельминтоз же курттар.
